Panawagan

PANAWAGAN

napadaan lang ako noon sa U.P. Diliman

nang makita yaong nakasulat na panawagan

"Contractual, Gawing Regular", aba'y marapat naman

lalo na't islogang makatao't makatarungan

panawagan nilang ito'y sadyang napapanahon

anuman ang kanilang unyon o organisasyon

kabaong sa manggagawa ang kontraktwalisasyon

kapitalistang pandaraya ang iskemang iyon

kaya nag-selfie ako sa islogang nakasulat

bilang pakikiisa sa manggagawa, sa lahat

ng nakikibaka, lalo sa mga nagsasalat

sa mga obrero'y taas-noong pasasalamat

O, mga manggagawang kontraktwal, magkapitbisig

manggagawang regular ay kakampi ninyo't kabig 

kayong iisang uri'y magturingang magkapatid

iskemang kontraktwalisasyon nga'y dapat mapatid

- gregoriovbituinjr.

12.29.2021

Kartilya

KARTILYA

dinaraos tuwing ikapito ng bawat buwan,

ikapito ng gabi, pulong na makasaysayan

doon binabasa ang Kartilya ng Katipunan

sa isang seremonyang talaga namang dibdiban

tulad ng petsa ngayon, ikapito ng Nobyembre

na dinaraos kahit nasa malayo man kami

sumabay man sa Dakilang Rebolusyong Oktubre 

ikasandaang apat na anibersaryo nire

maraming salamat sa pangkat ng Kamalaysayan

o Kaisahan sa Kamalayan sa Kasaysayan

na tuwing sumasapit ang ikapito ng buwan

ay sinasariwa ang Kartilya ng Katipunan

ito'y Kartilyang patnubay sa pagpapakatao

pawang inaaral bago maging Katipunero

sinulat, pinagtibay, pinalaganap sa tao

nina Gat Andres Bonifacio't Emilio Jacinto

higit dalawang dekada ko nang sinasabuhay

ang Kartilyang itong sadyang isinapusong tunay

nakikibaka, maralita't obrero'y karamay

halina't itaguyod sa madla ang gintong gabay

- gregoriovbituinjr.

11.07.2021

Sahod

SAHOD

isinusulat kong pataludtod

ang nakakaawa nilang sahod

parang hinihintay sa alulod

patak ng kanilang paglilingkod

pag paksa'y ganyang nakakaluhâ

pagtula'y di na nakakatuwâ

ngunit may tungkulin ang makatâ

na masa'y ipagtanggol sa tulâ

kahit makata'y di mapalagay

bawat isyu'y unawaing tunay

kalutasang dapat matalakay

sahod at lakas-paggawa'y pantay

paano ang dapat nilang gawin

upang mga ito'y pagpantayin

pagkat iyon ang dapat tanggapin

nilang mga sahurang alipin

dapat ay makatarungang sahod

para sa obrerong naglilingkod

makatarungan, pantay na sahod

upang di na sila manikluhod

sa produktong kanilang nalikha

may kapantay na lakas-paggawa

subalit di mabayarang tama

bigay lang ay sahod na kaybaba

negosyo raw kasi ay babagsak

kahit sila'y tumubo ng limpak

obrero'y gumapang man sa lusak

di ibibigay ang sweldong tumpak

anang isang namimilosopo

subukan mo kayang magnegosyo

upang ang ganito'y malaman mo

bakit dapat baratin ang sweldo

at di dapat bayaran ng tama

iyang kanilang lakas-paggawa

baka malaking kita'y mawala

kung ibibigay sa manggagawa

ganyan pag nabisto ang mahika

nitong sistemang kapitalista

kaya manggagawa, magkaisa

baguhin ang bulok na sistema

- gregoriovbituinjr.

11.07.2021

(Kinatha kasabay ng ika-104 anibersaryo ng Dakilang Rebolusyong Oktubre)

Pagkatao

PAGKATAO

payo sa akin nga'y huwag laging nakatunganga

sa kawalan kahit isang masipag na makata

makihalubilo pa rin sa mga maralita

at makipagkapitbisig pa rin sa manggagawa

dapat nang asikasuhan ang anumang naiwang

tungkulin at gawaing sa balikat nakaatang

di dapat kalimutang isang tibak na Spartan

at organisador ng makauring tunggalian

magpalakas ng katawan, muling magbalik-aral

upang sa sagupaan ay di agad matigagal

lalo't buhay ay dedikado sa pagiging kawal

ng kilusang paggawa, kaya huwag hinihingal

di dapat mawala ang ugnay sa sariling uri

bilang proletaryadong may adhikain at mithi

bilang makata'y isulat bawat isyu't tunggali

hanggang mithing lipunang makatao'y ipagwagi

- gregoriovbituinjr.

11.01.2021

Pagkakaisa

PAGKAKAISA

may agad akong nagunita nang mabasa iyon

kasabihang sa buhay ay may prinsipyadong layon

mula sa Etiyopya, animo'y tula at bugtong

ang: "When "When spider webs unite, they can tie up a lion."

na maikukumpara sa nabasa ko ring taos

ito'y: "Workers of the world, unite! You have nothing to lose

but your chain," kung manggagawa nga'y magkaisang lubos

puputlin nila ang kadena ng pagkabusabos

kung magkapitbisig tulad ng sapot ng gagamba

magagapos nila ang leyong mapagsamantala

at sa pang-aapi sa masa'y di na makadamba

tulad ng pagtapos sa paghahari ng burgesya

dahil Tao'y tao, ating kapwa, may karapatan

tulad ng mga manggagawang aliping sahuran

kung walang manggagawa, wala tayong kaunlaran

kanilang mga kamay ang nagbuo ng lipunan

sapot ng gagamba'y ihanda nating buong giting

upang igapos ang leyong dahilan ng ligalig

manggagawa, magkaisa, mensahe'y iparating

upang bulok na sistema'y palitan na't malupig

- gregoriovbituinjr.

10.25.2021

#LaborPowersa2022

#ManggagawaNamansa2022

* ang litrato ay screenshot mula sa yutyub

Manggagawa, Pangulo ng bansa

MANGGAGAWA, PANGULO NG BANSA

isang bus driver si Pangulong Nicolas Maduro

ng bansang Venezuela, tunay na lider-obrero

guro sa primarya ang sa Peru'y kumandidato

at nanalo, siya si Pangulong Pedro Castillo

obrero sa pabrikang metal, lider-unyonista

yaong pangulo ng Brazil na si Lula da Silva

manggagawa rin ang naging Pangulo ng Bolivia

na si Evo Morales, nakatatlong termino na

ipinanalo ng kanilang mamamayang dukha

at ng kapwa nila mahihirap na manggagawa

di trapo, di elitista ang namuno sa bansa

di mayayamang bobotante ang turing sa madla

totoong lider ang nais ng mga mamamayan

na talagang maglilingkod sa madla't buong bayan

sa atin, manggagawa'y tumakbo sa panguluhan

sa katauhan naman ni Ka Leody de Guzman

bayan ay sawa na sa dinastiya't mga trapo

na nanggaling sa iisang pamilya't apelyido

huwag na sa trapong yaong dukha'y laging dehado 

manggagawa naman ang iboto nating pangulo

- gregoriovbituinjr.

10.19.2021

Mga pinaghalawan:

https://www.nbcnews.com/storyline/venezuela-crisis/nicolas-maduro-path-bus-driver-venezuelan-president-n788121

https://www.bbc.com/news/world-latin-america-57941309

https://en.wikipedia.org/wiki/Evo_Morales

https://edition.cnn.com/2016/03/17/world/lula-da-silva-profile/index.html

https://www.youtube.com/watch?v=QSehQ5sbxBs

Inemuri

INEMURI

sa atin, pag nahuling natutulog sa trabaho

baka di lang sitahin, sibakin pa ang obrero

kaya ka raw nasa trabaho'y upang magtrabaho

dahil sayang lang daw ang sa iyo'y pinapasweldo

sa Japan, ang matulog sa trabaho'y karaniwan

tinuturing na tanda ng sipag at kapaguran

bilang manggagawa, ang ganito'y patunay lamang

na sila'y tao rin, di makina sa pagawaan

ang tawag dito ng mga Hapon ay "inemuri"

na kung ating pakikinggan ay tunog "In Memory"

dahil ba sa pagtulog, may nagunitang sakbibi

ng lumbay, maganda'y kung napanaginip ang kasi

diwa ng inemuri'y di ubra sa ating bayan

sa loob ng walong oras kang nasa pagawaan

ang turing sa nagtatrabaho'y aliping sahuran

kung nais mong matulog, umuwi ka ng tahanan

subalit inemuri'y kailangan din sa atin

lalo't sitwasyon ng babaeng manggagawa natin

mula sa pabrika, sa bahay pa'y may trabaho rin

siyang tunay, silang nagtitiis sa double burden

ang diwa ng inumeri ay pagpapakatao

kailangan ng malalimang pang-unawa rito

lalo't kalagayan ng kanilang mga obrero

na talagang napapagod din sa pagtatrabaho

unawain at gamitin ang diwang inemuri

sakaling napaidlip ang manggagawa't nahuli

huwag sibakin agad ang pagod na trabahante

gisingin at pagsabihan ang obrerong nasabi

- gregoriovbituinjr.

10.14.2021

* ang dalawang litrato ay screenshot mula sa youtube

Labor Power sa 2022

LABOR POWER SA 2022

kung sawang-sawa ka na sa political dynasties

na laging naluluklok habang masa'y nagtitiis

sa hirap at pagsasamantala ng mga burgis

may pag-asa pa, sa MANGGAGAWA tayo'y magbigkis

kung sawang-sawa ka nang mamayagpag muli'y trapo

naluluklok ay pamilyang iisang apelyido

anong napala sa tradisyunal na pulitiko?

nganga ang bayan, nais ba nating laging ganito?

laging elitista't mayayaman ang naluluklok

pati artistang sumayaw lang, nalagay sa tuktok

tingin nila sa masa'y tagaboto't tagaluklok

dapat nang mapatid ang ganitong sistemang bulok

panahon nang ikampanya natin ang manggagawa

at iluklok natin ang kandidato ng paggawa

silang dahilan upang umunlad ang mga bansa

walang pag-unlad sa buong mundo kung sila'y wala

kung walang manggagawa, walang tulay at lansangan

sa Makati ay walang gusaling nagtataasan 

walang gusali ang Kongreso, Senado, Simbahan

walang nakatayong White House, Kremlin o Malakanyang

nilikha ng manggagawa ang mga ekonomya

umikot ang dolyar, ang piso, ang maraming kwarta

sila ang gumagawa kaya bansa'y kumikita

manggagawa ang nagpapaikot ng mundo, di ba?

kaya panahon namang manggagawa ang iluklok

at ang mga political dynasties ay ilugmok

lider-manggagawa ang ating ilagay sa tuktok

upang tuluyang mapalitan ang sistemang bulok

isang sistemang nagdulot ng pagsasamantala

ng tao sa tao kaya maraming aping masa

panahong nang ilugmok ang elitista't burgesya

na nagpanatili lang ng dusa't hirap sa masa

si Ka Leody de Guzman ang ating kandidato

sa susunod na halalan, tumatakbong pangulo

batikang labor leader, mapangahas, matalino

kasangga ng manggagawa't ng karaniwang tao

si Atty. Luke Espiritu sa senado naman

na maraming unyon ang pinanalo't tinulungan

silang dalawa ang kandidatong maaasahan

sigaw ng manggagawa'y dinggin: MANGGAGAWA NAMAN!

- gregoriovbituinjr.

10.11.2021

Kwento sa taksi

KWENTO SA TAKSI

kwento ng kapwa manggagawa sa puso ko'y tagos

tanong sa taxi driver, sinong ibobotong lubos

sagot sa kanya, sa lesser evil, baka walang loss

kaysa di kilala, sa hirap di tayo matubos

ilang eleksyon nang pinili mo ay lesser evil?

may napala ba ang bayan sa mga lesser evil?

wala, di ba? bakit iboboto'y demonyo't sutil

huwag bumoto sa mga demonyo't baka taksil

may tumatakbong manggagawa sa pagka-pangulo

si Ka Leody de Guzman, isang lider-obrero

sagot niya, di naman kilala ang tumatakbo

maging praktikal tayo, hindi siya mananalo

ilang beses ka nang naging praktikal sa halalan

kahit alam mong demonyo'y pagkakatiwalaan

sa pagka-pwesto ba nila'y may napala ang bayan?

sagot niya, wala kasing ibang maaasahan

ngayong halalan, may nagbukas na bagong pag-asa

ang katulad mong manggagawa ay tumatakbo na

kung mga manggagawang tulad mo'y magkakaisa

lider-obrero ang pangulo sa bagong umaga

- gregoriovbituinjr.

10.10.2021

* maraming salamat kay kasamang Larry sa kwentong ito

* maraming maraming salamat din po sa litrato mula sa pesbuk

Pamumuno

PAMUMUNO

pag binigyan ka ng pambihirang pagkakataon

ng kasaysayan upang mamuno, kunin mo yaon

huwag mong tanggihan pagkat para sa iyo iyon

kusa mong tanggapin ang sa kakayahan mo'y hamon

sayang ang mga pagkakataong pinalalampas

di naman mula kay Eba ang bigay na mansanas

o kaya'y ang binantayan ni Juan na bayabas

huwag kang mahiya, kaya mong mamuno ng patas

iyan ang tangan kong prinsipyo't ipinapayo ko

pambihirang pagkakataon ba'y tatanggihan mo?

huwag mong hayaang liparin lang ng hangin ito

tanggapin ang pagkakataong dumapo sa iyo

lalo't mamumuno't magsisilbing tapat sa bayan

di tumulad sa ibang nagpapalaki ng tiyan

kain, tulog, at pulos bisyo lamang sa katawan

pamumuno naman ay iyo ring matututunan

mag-aral ka, at ilibot sa paligid ang mata

lipuna'y suriin, makisalamuha sa masa

kung may pagkakataong mamuno, tanggapin mo na

tanging payo'y maging patas at makatarungan ka

- gregoriovbituinjr.

10.09.2021

Maligayang Araw ng mga Guro

MALIGAYANG ARAW NG MGA GURO

sa lahat po ng guro, taasnoong pagpupugay

sa paglaki namin, guro'y sandigan at patnubay

bukod sa aming magulang ay guro ang nagpanday

ng isip at asal ng estudyante, naging gabay

ang mahal kong ina ang talagang una kong guro

ang aking ama naman ay kayrami ring tinuro

upang kaming mga anak ay sadyang mapanuto

silang nagturo't gumabay ng may buong pagsuyo

salamat sa guro ng kinder at elementarya

tunay kayong sa aming puso't diwa'y mahalaga

di lang itinuro'y wika, agham, matematika

kundi good manners and right conduct, wastong disiplina

sa mga guro ko ng hayskul, nagpupugay ako

di rin malimot ang mga guro sa kolehiyo

sa lahat ng aming naging guro, mabuhay kayo!

sa lahat ng guro, kami'y taasnoong saludo!

- gregoriovbituinjr.

10.05.2021

* litratong kuha ng makata noong 2016

Si Jose Mari Chan at ang mga natanggal na obrero

SI JOSE MARI CHAN AT ANG MGA NATANGGAL NA OBRERO

'ber months na, maririnig na naman natin ang mga

awiting pamasko datapwat Pasko'y malayo pa

wala pang Undas, pauso na ng kapitalista

nang pamaskong regalo'y maihanda't mabili na

habang umeere ang tinig ni Jose Mari Chan

may isang paalala lamang si kasamang Emman

isang union buster at sa manggagawa'y kalaban

si Jose Mari Chan, masakit na katotohanan

sa Hotel Enterprises of the Philippines, pangulo

ang Hyatt Regency Manila'y pag-aari nito

babayarang service charge na one point three milyong piso

ay kanya pang ipinagkait sa mga obrero

dulot nito'y illegal mass lay-off ng manggagawa

higit dalawang daan silang trabaho'y nawala

sa kabila ng awit, may lihim palang nagawa

na sa mga obrero'y bagay na kasumpa-sumpa

at salamat, Ka Emman, sa pagbubulgar mong ito

di mo kasalanan, tapat ka lang sa tungkulin mo

habang umaawit si Chan, tandaan natin ito

dahil sa kanya'y kayraming nawalan ng trabaho

- gregoriovbituinjr.

09.02.2021

* litrato mula sa post sa fb ni Emman Hizon na nakilala ko noong siya'y nasa Freedom from Debt Coalition (FDC) pa

Diwang mapagpalaya

DIWANG MAPAGPALAYA

simpleng pamumuhay at puspusang pakikibaka

ang isinasabuhay ng tulad kong aktibista

patuloy na kumikilos at nag-oorganisa

tungo sa pagtatayo ng lipunang ninanasa

binabasa ang akda't kasaysayan ng paggawa

upang tuluyang tagpasin ang gintong tanikala

tungo sa adhikang pagbabagong mapagpalaya

tungo sa lipunang ang bawat isa'y maginhawa

tungo sa asam na lipunang walang mga uri

lipunang hindi hinahati, walang naghahari

ugat ng kahirapan ay pribadong pag-aari

nitong kasangkapan sa produksyon, dapat mapawi

lipunang bibigkis sa matinding pagkakaisa

ng sangkatauhan laban sa pagsasamantala

lipunang nakatindig sa panlipunang hustisya

at karapatang pantao, na pantay bawat isa

tara't magbasa ng mga mapagpalayang akda

tungo sa pagkakaisa ng uring manggagawa

upang lipunang hangad nila'y maitayong sadya

at lahat ay makinabang sa bunga ng paggawa

- gregoriovbituinjr.

08.28.2021

Paslit

PASLIT

bagamat hitik sa bunga ang puno ng kalumpit

na paborito namang pitasin ng mga paslit

subalit kung mahuhulog sa puno'y anong sakit

kahit kapwa batang nakakita'y napabunghalit

bagamat paslit dahil sa kamurahan ng gulang

bawat isa sa kanila'y may angking karapatan

karapatan nila ang mag-aral sa paaralan

subalit di ang magbungkal sa mga basurahan

sa murang edad ay karapatan nilang maglaro

mag-aral at maglaro silang may buong pagsuyo

tatanda agad kung nagtatrabahong buong puso

gayong bata pa, ang kabataan nila'y naglaho

kung ang bunga ng kalumpit ay madaling mapitas

yaong batang nagtratrabaho na'y malaking bigwas

sa kanyang pagkabatang di na niya nadadanas

bata pa'y nagtrabaho upang makabiling bigas

protektahan ang bata, pagkabata'y irespeto

huwag hayaang sa maagang gulang magtrabaho

ngunit kung dahil sa hirap, gagawin nila ito

karapatan nila bilang mga bata'y paano?

- gregoriovbituinjr.

08.24.2021

* mga litrato mula sa google

Lipunang pangarap

LIPUNANG PANGARAP

isang sistemang parehas, lipunang manggagawa

ang pangarap naming itayo, kasama ng dukha

kami'y kumikilos tungo sa lipunang malaya

at walang kaapihan, lipunang mapagkalinga

kaya ngayon ay nakikibaka kaming totoo

upang itayo'y asam na lipunang makatao

na walang pagsasamantala ng tao sa tao

kalagayan ng tao sa mundo'y sosyalisado

ang kapitalistang sistema'y tuluyang palitan

nang mas abante't patas na sistema ng lipunan

anupaman ang tawag, kung sosyalismo man iyan

mahalaga'y pantay at parehas ang kalakaran

papalit sa uring kapitalista'y ang obrero

na siyang mamumuno sa lipunang makatao

walang maiiwan, pulubi man, sa pagbabago

lahat ay nakikipagkapwa't nagpapakatao

kung ugat ng kahirapa'y pribadong pag-aari

di na iyan dapat pang umiral ni manatili

pagsulpot ng iba't ibang uri'y dapat mapawi

pakikibaka mang ito'y pagbabakasakali

iyan ang pangarap ko't pangarap din ng marami

kaya sa pakikibaka'y nagpapatuloy kami

upang sa kahirapan, ang tao'y di na sakbibi

may paggalang sa dignidad, bawat isa'y kasali

- gregoriovbituinjr.

08.21.2021

Babasahin sa paggawa

BABASAHIN SA PAGGAWA

kung mababasa lang ang lathalaing paggawa

baka naghimagsik na ang nagtatrabahong madla

laban sa sistemang pinaiiral ng kuhila

o mga taksil na tubo lang ang inaadhika

samahan sa paggawa'y patuloy na umiiral

habang lipunang pangarap nila'y pinangangaral

mula sa primitibo komunal, alipin, pyudal

at paano palitan ang sistema ng kapital

mayroong hanggang reporma lang ang inaadhika

animo'y pinakikintab ang gintong tanikala

nais ng marami'y rebolusyon ng manggagawa

at itayo ang isang lipunang mapagkalinga

ang mga araling ito'y dapat nating basahin

mga babasahin itong dapat nating aralin

at kung kaya, bawat manggagawa'y pagkaisahin

patungo sa lipunang makatao'y pakilusin

- gregoriovbituinjr.

08.21.2021

* litratong kuha ng makatang gala mula sa mga nasaliksik na babasahin sa aklatan ng opisina ng paggawa

Ang estado

ANG ESTADO

napaka-teyoretikal ng mga pag-usisa

ano ba ang estado o yaong pamamahala

ng isang teritoryo, rehiyon, o kaya'y bansa

o pangkat ng mga taong nabuhay ng malaya

anong kasaysayan ng Atlantis, ayon kay Plato

bakit nga ba ito ang ideyal niyang estado

si Engels naman, sinuri'y pag-aaring pribado

pati na pinagmulan ng pamilya't ng estado

ang isa pa'y ang Estado't Rebolusyon ni Lenin

hinggil sa estadong dapat pag-aralang taimtim

anong kakapal ang mga librong dapat basahin

nakakatuwa kung buod nito'y malaman natin

anong mga nangyari sa primitibo komunal

bakit nawala't lipunang alipin ang umiral

bakit panginoong maylupa'y naghari sa pyudal

paanong lipuna'y binago ng mangangalakal

bakit ang aring pribado'y ugat ng kahirapan

bakit laksa'y mahihirap, mayaman ay iilan

bakit may inaapi't pinagsasamantalahan

paano itatayo ang makataong lipunan

paano sumulpot ang mga uri sa estado

bakit may watawat, pulis, teritoryo't husgado

paano sumulpot ang diktadura't ang gobyerno

anong halaga ng pakikibaka ng obrero

mga inaral na ito'y ibahagi sa masa

lalo't inaasam nila'y karapata't hustisya

paano kamtin ang lipunang para sa kanila

kung saan pantay, parehas at patas bawat isa

- gregoriovbituinjr.

08.19.2021

Tanong ng manggagawa

TANONG NG MANGGAGAWA

"Bakit manggagawa ang unang magsasakripisyo

para isalba ang negosyo?" tanong ng obrero

ito ba'y nakaliligalig na tanong sa iyo?

ah, dapat pag-isipang mabuti ang tugon dito

nang magkapandemya, sinara ang mga pabrika

ekonomya'y bumagsak, di napaikot ang pera

tila hilong talilong ang mga ekonomista

kung paano ibangon ang nasaktang ekonomya

trabaho'y tigil, sa manggagawa'y walang pansahod

kayraming apektado, gutom ay nakalulunod

ayuda'y minsan lang natanggap, ngayon nakatanghod

saan kukuha ng ipangkakain sa susunod

nang magluwag ang lockdown, tila nagbalik sa normal

pinapasok ng kapitalista'y mga kontraktwal

halos di papasukin ang manggagawang regular

kontraktwalisasyon na pala'y muling pinairal

pamahalaan naman, negosyo'y inayudahan

bine-bail out upang negosyo'y di raw magbagsakan

bilyon-bilyon sa negosyo, sa obrero'y libo lang

baka ekonomya'y maiangat daw ng tuluyan

lumilikha ba ng ekonomya'y kapitalista

di ba't manggagawa ang lumikha ng ekonomya

kaya bakit negosyo ang unang isinasalba

na para bang ating mundo'y pinaiikot niya

"Bakit manggagawa ang unang magsasakripisyo

para isalba ang negosyo?" tanong ng obrero

isang tanong pa lang ito, na napakaseryoso

na dapat sagutin nang husay ng ating gobyerno

kung di iyan matugunan pabor sa manggagawa

ang bulok na sistema'y dapat nang baguhing sadya

halina't patuloy kumilos tungo sa adhika

na lipunang makatao'y itatag ng paggawa

- gregoriovbituinjr.

08.08.2021

* mga litratong kuha ng makatang gala sa pagkilos ng manggagawa sa harap ng DOLE sa Intramuros noong Hulyo 23, 2021